Smíði nýrra skipa Samskipa gengur vel
Krónur og evrur undir kjölinn!
Vinna við smíði nýrra gámaskipa Samskipa, sem leysa af hólmi Arnarfell og Helgafell, gengur vel hjá þýsku skipasmíðastöðinni J.J.Sietas í Hamborg. Er gert ráð fyrir að nýju skipin verði bæði komin í reglubundnar siglingar fyrir félagið milli Íslands op meginlands Evrópu fyrir febrúarlok á næsta ári.
Kjölur var lagður að nýja Helgafellinu í liðinni viku og að nýja Arnarfellinu um miðjan september. Við það tækifæri var smámynt, bæði íslenskar krónur og evrur, lögð undir kjöl skipanna. Er það gamall og góður siður og á að tryggja að skipin verði bæði farsæl og gjöful!
Sjósetning nýja Arnarfellsins er áætluð um miðjan næsta mánuð og í lok janúar nk. á það að vera tilbúið til afhendingar. Sjósetning nýja Helgafellsins er svo fyrirhuguð mánuði síðar, eða um miðjan desember, og verður það afhent Samskipum í lok febrúar á næsta ári.
