Samskip bæta enn þjónustuna við Færeyjar

-Arnarfell og Helgafell með viðkomu vikulega í Þórshöfn

19.11.2004

Í framhaldi af opnun nýrrar skrifstofu Samskipa í Þórshöfn í Færeyjum í lok september sl. hefur nú verið ákveðið að fjölga ferðum félagsins þangað. Frá og með annarri viku í desember munu skip félagsins, Arnarfell og Helgafell, hafa viðkomu í Þórshöfn á leið sinni frá Evrópu til Reykjavíkur. Fyrsta viðkoma þar verður 13.desember nk.

Þetta er gert til að bæta enn frekar þjónustu Samskipa við innflytjendur og aðra viðskiptavini í Færeyjum því félagið verður nú vikulega með beinar siglingar til Þórshafnar frá Evrópu og Norðurlöndunum. Þannig getur varningur sem skipað er um borð í skip Samskipa á föstudegi í Árósum, verið kominn til Þórshafnar á mánudegi, eða aðeins þremur dögum síðar.

Aðeins rétt rúmlega hálft ár er liðið frá því að Samskip hófu siglingar til Klakksvíkur í Færeyjum, á leið frá Íslandi til Bretlands og meginlands Evrópu. Hafa Skaftafellið og Akrafell viðkomu þar vikulega og eru engar breytingar fyrirhugaðar á þeim áætlunarsiglingum.