Titill Þrettán flutningatæknar útskrifast úr Flutningaskóla Samskipa

Alls hafa 50 nemendur útskrifast frá skólanum frá því hann var settur á laggirnar haustið 2008. Boðið er upp á tvíþætt fagnám og starfsnám í flutningum í skólanum sem starfræktur er í samstarfi við Mími símenntun.

„Stefna Samskipa er að stuðla stöðugt að auknum lærdómi starfsfólks. Fræðsla skal vera hluti af framtíðaráætlun hvers starfsmanns á þann hátt að viðkomandi hafi möguleika á að auka við þekkingu sína og færni í núverandi starfi, auk þess að afla sér þekkingar á nýjum sviðum. Starfsfólkið þarf að vera vel að sér og skilja hvernig best er að framkvæma hlutina og taka ákvarðanir sem byggðar eru á faglegum skilningi á viðskiptavinum okkar og þeirra þörfum,“ sagði Auður Þórhallsdóttir, mannauðsráðgjafi Samskipa, m.a. í ávarpi sínu við skólaslitin í gær, að viðstöddum framkvæmdastjóra Samtaka verslunar og þjónustu, forstjóra Samskipa, nemendum og gestum.

Flutningaskóli Samskipa er fyrir starfsmenn sem eiga stutta formlega skólagöngu að baki og starfa í vöruhúsum, á gámavelli eða sem bílstjórar. Nokkur starfsþróun hefur átt sér stað hjá því starfsfólki Samskipa sem þegar hefur útskrifast úr skólanum og sagði Auður að um helmingur þeirra tækist nú á við ný og ábyrgðarmeiri störf.

„Einnig hafa átta úr þessum hópi farið í diplómanám í flutninga- og vörustjórnun í Háskólanum í Reykjavík og staðið sig með sóma og eru Samskip afar stolt af árangri þeirra.“

Kennslan í Flutningaskólanum byggist á viðurkenndri námskrá Fræðslumiðstöðvar atvinnulífsins og er námið viðurkennt af menntamálaráðuneytinu til allt að 23 eininga í framhaldsskóla. Námið tekur tvær annir og er tæplega 400 kennslustundir. Kennt er í vinnutíma starfsmanna tvisvar til þrisvar í viku og fer kennslan fram á athafnasvæði Samskipa við Kjalarvog. Kennarar frá Mími sjá um almenna kennslu en sértæk fög er snúa að flutningafræði, öryggismálum, tölvum og upplýsingatækni ásamt vinnustaðanámi eru í umsjón sérfræðinga Samskipa. Starfsfólk Samskipa hefur einnig samið og gefið út fyrstu kennslubókina í flutningafræðum sem gerð hefur verið á Íslandi.