Dr. Vesna inn í stjórn Samskipa

Á aðalfundi í Samskipum fyrr í mánuðinum, var Dr. Vesna Nevistic kjörin í stjórn Samskipa hf. og Samskip Holding BV.

Dr. Nevistic er 48 ára gömul, fædd og uppalin í fyrrum Júgóslavíu og hefur serbo–króatísku að móðurmáli. Hún stundaði framhaldsnám sitt í Sviss og Ameríku og lauk doktorsprófi í rafmagnsverkfræði 1997. Vesna hefur mestan hluta  starfsævinnar unnið í Sviss og talar fjölda tungumála reiprennandi. Það var árið 1997 að McKinsay réði hana til starfa og varð hún ein af eigendum árið 2003. 2006 flutti hún sig til Goldman Sachs þar sem hún var stjórnandi til ársins 2009 þegar hún færði sig til UBS bankans þar sem hún var yfir breytingastjórnun.

Dr. Nevistics hefur víðtæka reynslu úr viðskiptalífinu, sem greinandi og sem ráðgjafi forstjóra margra stærstu fyrirtækja heims úr hinum ýmsu geirum, m.a flutningageiranum. Hún hefur varið miklum tíma í skipulagsmál (e. infrastructure), vörustjórnun og flutninga, auk einkabankaþjónustu. Hún er þrautþjálfuð í stefnumótun og að vinna að endurbótum verkferla auk breytingastjórnunar.

 „Það er mikill fengur að fá svo reynslumikinn einstakling í stjórn, segir Ólafur Ólafsson stjórnarformaður Samskip Holding BV. Dr Nevistic er hokin af reynslu þrátt fyrir ungan aldur og tengsl hennar og þekking er Samskipum mikilvæg. Með þessari breytingu uppfylla Samskip líka íslensk lög um kynjakvóta í stjórnum.“