Samskip á alþjóðlegu sjávarútvegssýningunni í Brussel

Sýningin er lang viðamesta sjávarútvegssýning sem haldin er í heiminum en hana sækja á hverju ári um 25 þúsund gestir sem tengjast sjávarútvegi á einn eða annan hátt. Sýningin í Brussel er því mikilvægur vettvangur til að kynna flutningsnet Samskipa og áherslur fyrirtækisins.
Íslandsstofa sér um heildarskipulag íslenska sýningarsvæðisins sem er í sýningarhöll fjögur. Bás Samskipa er númer 6115 og þar verður vel tekið á móti gestum og gangandi. Þetta er í 21. skiptið sem Samskip taka þátt í þessari umfangsmiklu sýningu.
 Engan bilbug er að finna á sýningarhöldurum þrátt fyrir þá hörmulegu atburði sem áttu sér stað í Brussel í síðasta mánuði. Umfangsmikil öryggisgæsla verður í borginni vegna sýningarinnar. Boðið verður uppá rútuferðir fyrir sýnendur og gesti frá helstu hótelum í miðborginni til að forðast lestarstöðvar borgarinnar. Einnig má reikna með hertri öryggisgæslu við sýningarsvæðið sjálft og eru þátttakendur og gestir hvattir til að skipuleggja tíma sinn með tilliti til þess.  
 ​Starfsmönnum Samskipa sem almennt sækja sjávarútvegssýninguna er í sjálfsvald sett hvort þeir taka þátt í henni að þessu sinni. Enginn þeirra hefur hætt við þátttöku enn sem komið er og við reiknum með góðri sýningu í ár, eins og undanfarin ár.