Samskip Multimodal og DSM hafa þróa nýjan „léttgám“

Samskip Multimodal í Evrópu og gámafyrirtækið DSM hafa þróað nýjan „léttgám“, HighQ^TM sem er um 20% léttari en hefðbundnir þurrgámar. Hefur þróunin á gámnum staðið frá árinu 2009 og voru orkusparnaður, aukin nytsemi og minni þyngd höfð að leiðarljósi við þróun nýja HighQ^TM gámsins.
Helsti ávinningurinn er aukin hagkvæmni. Minni þyngd ásamt nýrri loftstreymishönnun minnka eldsneytisþörf á meðan á flutningi stendur í samanburði við hefðbundna gáma. Minni þyngd á gámnum sjálfum kemur sér einnig vel þegar þyngdartakmarkanir eiga við, eins og í flutningi með bílum og lestum, þar sem meira svigrúm er fyrir farminn sjálfan.
Samsettir flekar koma í stað hefðbundinna stálveggja og flatar hliðar gera lestun og losun auðveldari, auk þess sem þrif verða þægilegri og minni óhreinindi setjast í gáminn. Eru hornin sérstaklega styrkt til að vernda þakið við alla meðhöndlun. Þetta lengir líftíma gámsins og fer betur með farminn. Fyrsti 45 feta gámurinn var vottaður í júní 2011 og hefur nú verið í prófun hjá Samskipum í rúmt ár.
„Við erum mjög ánægð með þennan nýja gám og höfum gert ítarlegar prófanir á honum“ segir Diederick Blom, framkvæmdastjóri hjá gámaflutningasviði Samskipa í Evrópu. „Við erum mjög ánægð með samstarfið við DSM, við deildum okkar þekkingu og hugmyndum og við hlökkum til að geta boðið viðskiptavinum okkar fyrstu gámana á næsta ári.“